10:45 გიორგი თარგამაძე პარლამენტში პრეზიდენტის სიტყვით გამოსვლამდე პრობლემატურ საკითხებზე დისკუსიის გამართვას ითხოვს | |
საპარლამენტო უმცირესობის ლიდერი გიორგი თარგამაძე პარლამენტში პრეზიდენტის სიტყვით გამოსვლამდე პრობლემატურ საკითხებზე დისკუსიის გამართვას ითხოვს.
როგორც თარგამაძემ პარლამენტის ბიუროს გუშინდელ სხდომაზე განაცხადა, "კარგი იქნება, თუ პარლამენტში გარკვეული მოთელვის სახით საკომიტეტო ფორმატში დისკუსია მოეწყობა, რომელზეც ქვეყანაში ინფლაციური პროცესების განვითარებას განიხილავენ". ზოგადად კი თარგამაძე პარლამენტში საგაზაფხულო სესიის დასაწყისშივე პრეზიდენტის მოხსენებით გამოსვლის ტრადიციას მიესალმება. "წლის დასაწყისშივე მნიშვნელოვანი პრიორიტეტების გამოკვეთას დიდი მნიშვნელობა აქვს. იმედი გვაქვს, თავად საპარლამენტო უმრავლესობა და პრეზიდენტი სააკაშვილიც კარგად ითვალისწინებენ, რამდენად დიდია მოლოდინები დემოკრატიული ტრანსფორმაციისა და პოლიტიკური სისტემის შემდგომი განჯანსაღების კუთხით", - განაცხადა თარგამაძემ. შეგახსენებთ, რომ მომავალ კვირას პრეზიდენტი პარლამენტში ყოველწლიური მოხსენებით წარსდგება. | |
|