„აფსნი პრესმა" დღეს გაავრცელა ინფორმაცია იმის შესახებ, რომ ე.წ. რუსეთის ელჩმა აფხაზეთში სემიონ გრიგორიევმა სერგეი ბაღაფშს წარუდგინა აფხაზეთში რუსეთის ფედერაციის სავაჭრო წარმომადგენელი იური აიკინი.
ეს არის კიდევ ერთი თანამდებობა რუსეთის ხელისუფლების წარმომადგენლისა საქართველოს ოკუპირებულ ტერიტორიაზე. ეს არის რუსეთის კიდევ ერთი ხაზგასმა, რომ ის სოხუმთან აწარმოებს სახელმწიფოთაშორის ურთიერთობას, ენგურს გაღმა საქართველოს განიხილავს დამოუკიდებელ და სუვერენულ სახელმწიფოდ. თანამდებობის ახალი პირის დანიშვნის შესახებ განკარგულებას ხელი მოაწერა რუსეთის პრემიერმა ვლადიმერ პუტინმა. აიკინი მუშაობდა სხვადასხვა თანამდებობაზე რუსეთის ფედერაციის ეკონომიკური განვითარების სამინისტროში. აიკინის წარდგენისას ე.წ. რუსეთის ელჩმა ხაზი გაუსვა იმას, რომ არც ისე დიდია იმ ქვეყნების რაოდენობა, რომლებშიც მუშაობენ რუსეთის სავაჭრო წარმომადგენლები. ამ სიტყვებით კრემლმა კიდევ ერთხელ გააკეთა აქცენტი იმ განსაკუთრებულ ურთიერთობაზე, რომელიც მას აქვს საქართველოს ტერიტორიებიდან წარმოქმნილ ფსევდოსახელმწიფოებთან.