მსოფლიოს ჩემპიონატის ბურთის შესახებ ბევრმა ვარსკვლავმა გამოთქვა კრიტიკული მოსაზრება. გუშინდელი დღიდან, მათ რიცხვს არგენტინის ნაკრების ლიდერი ლიონელ მესიც შეუერთდა. ლეომ თქვა, რომ ახალი ბურთი მასაც არ მოსწონს და ეუცხოვება.

"პირველივე თამაშში (ნიგერიასთან, 1:0) შევამჩნიე, რომ ბურთი ძალიან სხვანაირია. ვფიქრობ, ის პრობლემატურია არა მარტო მეკარეებისთვის, არამედ ჩვენთვის, მინდვრის ფეხბურთელებისთვისაც. იმედი მაქვს, რომ ამ ბურთს მალე შევეჩვევი, რადგან სხვა გზა არც მაქვს, ბურთს ხომ არავინ შეცვლის", - განაცხადა მესიმ პრეტორიაში გამართულ პრესკონფერენციაზე.

მესი ნიგერიასთან თავისი თამაშით უაღრესად კმაყოფილი დარჩა. "ჩემთვის ცოტათი უჩვეულო პოზიციაზე ვითამაშე, მაგრამ ძალიან კმაყოფილი ვარ. დიეგო მარადონამ შედარებით უკან დამხია და უფრო გამთამაშებლობა დამავალა, მთხოვა, უფრო ნახევარმცველი იყავი, ვიდრე თავდამსხმელიო. დიეგო მოედანზე სრულ თავისუფლებას მანიჭებს, რაც ძალიან კარგია. ნიგერიელებმაც მომცეს იმის საშუალება, რომ ჩემ სტილში მეთამაშა," - აღნიშნა 22 წლის ლეომ.

მესი ზოგადად არგენტინის ნაკრების თამაშითაც კმაყოფილი დარჩა. მისი აზრით, "ალბისელესტემ" კინაღამ ჩაგდებული შესარჩევი ეტაპის შემდეგ, უდიდესი პროგრესი განიცადა და ახლა სულ სხვა გუნდია - გუნდი, რომელსაც მსოფლიოს ჩემპიონატის მოგება შეუძლია.